اشيائي المفضلة لسنة 2016 | 2016 Favorite Things

السبت، 24 ديسمبر 2016

السلام عليكم ورحمة الله وبركاته


بوست اليوم بيكون مخصص لمفضلات سنة 2016 

حسيت ان وقته اكتب شنو اثر فيني وعجبني خلال هالسنة، 

المفضلات ليست محصورة للمنتجات الجمالية .. وانه متأكدة ان المتخصصين بيغطون هالموضوع اكثر 


بسم الله نبدأ .. 


مفضلاتي من الكتب: 

اخترت كتاب واحد .. هالسنة مقصره بالقراءة ولكن فيه كتاب حبيته وايد وامدح فيه اللي حولي

كتاب اوبرا وينفري What I Know For Sure 



غير حبي لها، هالكتاب خلصته في فترة قصيرة .. من زمان ما تحمست اثناء قراءة كتاب بحيث اكون متشوقة شنو يوجد في الصفحات اللي ما قريتها.. 

التوقيت كان ممتاز ايضاً قرأته في اجازتي السنوية 

اوبرا كتابها يتكلم ويحكي عن كذا جانب من جوانب الحياة اللي هي عانت فيها ولكنها تغلبت عليها ودروس في الحياة هي تعلمتها واكتشفت انها اصلا جزء مهم من تكوين شخصيتها ..

كتاب ما يحكي فقط حياتها، تعلمت منه وايد وانوي اعادة قرائته من كثر ما حبيته

مابي اكتب تفاصيله كثير لكن ابي اشرح فقط فكرته وليش بنظري خليته كتابي المفضل خلال 2016 

في كل جابتر تتكلم عن جانب من جوانب الحياة .. كيف كانت تعيشها وكيف  ساعدها تعيش صح .. خلتني افكر كيف انه اعيش هالجانب وقمت اطبق بعضا مما قالته وحسيت بغيير حلو .. التغيير يبدأ من نفسك ! 

استمتعت بكل صفحة .. وانصح بقراءته ♥




مفضلاتي من قرطاسية الاجندة

طبعا اتوقع يبين من المدونة ان انه مدمنة للقرطاسية! 

من الاشياء الجميلة اللي شريتها ووايد حبيت استخدمها هي اقلام Muji


الخط والكتابة فيها جميل جداً ودقيق ! طبعاً فيه اقلام من 0.5 , 0.7 , 0.35 !

وكفاية التنوع بالالوان الفرحة !



مفضلاتي من الاجهزة: 

بالنسبة لي جهازين حبيتهم وما استغني عنهم 

اول شي ساعة Apple Watch


مو اول ساعة للفتنس امتلكها .. هي الساعة رقم 4 .. واخر ساعة شريتها ومن بينهم وايد ارتحت فيها 

عندي ساعة جو بون .. ساعتين بولار وحده عادية والثانية متطورة اكثر ، 

لكن كانت هالساعة هي بالنسبة لي الاريح .. وحبيت نظامها اكثر من اي ساعة ثانية،

ولها مميزات غير الفتنس ايضاً اغلب البرامج صار لها تطبيق عليها فأعتبرها عملية،

البسها 70% من اوقاتي وشخصيا تشجعني اكثر شكثر تحركت خلال اليوم


ثاني جهاز .. جهاز فيلبس لليزر .. Philips Lumea SC2009



بعد ما قريت تدوينه اروى العمراني هـنـا ، قررت اشتريه .. على الرغم  الليزر اللي اسويه دايما بالعيادات

لكن لما تسوين جسمك كامل احسه مكلف .. فيه مناطق تحتاج فقط رتووش وادفع نفس مبلغ الجلسة الكاملة ..

كنت على الرغم من الريفيوز العالية للجهاز .. شاكه في فعاليته .. لكن سعره يسوى جلسة وحده ليزر ! 

من هالاساس قررت اخذه واذا ما استفدت منه اكون خسرت جلسه ! 

لكن بصراحة حبيته .. وحتى للرتوش ما توقعت ان يعطيني هالنتيجة 

طبعا فترات الجلسات بالبداية اقل .. اسبوعين بين كل جلسة .. لكن ماكان عندي مشكلة 

انصح فيه واختي اروى تدوينتها تتكلم عن كل تفاصيل الجهاز 



مفضلاتي من منتجات العناية بالجسم:

كريم ترطيب الجسم سليبي Sleepy  من Lush



طبعا كل منتج شريته من Lush كان جميل وناسبني وماندمت عليه

لكن هالكريم عشق! هو اثقل من اللوشن ويستخدم في الليل قبل النوم

لونه لافندري فاتح ويتكون من ماء الخزامي (لافندر) منقوع الشوفان وزبدة الكاكاو العضوية

تخيلوا الريحه !!  من شميتها بالمحل وانه حابه المنتج قبل لا اجربه وعقب ما جربته حبيته اكثر لان الترطيب وايد حلوو

تعديل: خلصته ورحت اشتريه .. لكن اكتشفت ان لمتد ادشن للاسف


ثاني منتج للجسم هو مجموعة Sleep Sommeil  من Bath and body works 



مجموعه ال Aroma Therapy عندهم كذا نوع هاذي حبيت انها تتكون من البابونج والافندر

لاحظوا ان وايد احب منتجات العناية ما قبل النوم والليلة، احب المنتجات اللي تساعد على الاسترخاء عقب يوم طويل

خذت اللوشن والشور جيل وسبري المخدة، ويستخدم ايضاً للجسم

حبيتها لان احسها ترخي الاعصاب والجسم وتخلي نومي اريح من اي نوع شور جيلات ثانية



المنتج الثالث هو عبارة عن شامبو للقشرة من Bioderma 



هاذي ثالث علبة اشتريها .. استخدمه كشامبو الاستخدام العادي اكثر الاوقات لان احب شعري عقبه ،

  واوقفه احيانا وارجع له لما احس ان القشرة وخصوصا بالشتاء بدت ووايد مناسبني

ولما اسافر لازم اخذه لان يعبر منقذ في الجو البارد (اتوقع لان استخدم ماء ساخن ويساعد ان القشرة تبتدي) لكن اذا شعرك طبيعته جافه كثير تأكدي ان يناسبك


شغله ثانية للشعر .. اخذتها من مدح الاخت (مها البحرين)

سيروم للشعر من Vatica


فيه كذا نوع وانه اخذت اللي يستخدم كحماية من الحرارة ،

حبيته ان ما يترك اثر دهني على الشعر وبالعكس يترك ملمس جميل ( طبعا يوضع على الاطراف )  وايضا مو العلبة الاولى اللي اشتريها

شعري طبيعته عادية ولكن بعض المنتجات تترك اثر دهني او بعض الشامبوهات ، شخصياً احسه ناسب كذا شخص اعرفه

انه شوي ملولة من المنتجات حتى لو حبيتها ، غيرته ورجعت له مره ثانية لان ماحصلت نفس النتيجة اللي عجبتني فيه



مفضلاتي من منتجات العناية بالوجه:

من مفضلات 2016 ايضاً كذا منتج من Caudalie 



مشترياتي من هالشركة كثير، لكن هاذي شخصيا الافضل في نظري ، بشرتي عادية إلى جافه

من اليمين:

- سيروم للوجه Radiance Serum عجبني وايد لان ينشف بسرعه بحيث اقدر استخدمه قبل المكياج، واحب بشرتي عقبه، هو تستخدمينه مرتين باليوم، لكن انه شخصيا بس مرة لان بالليل افضل احط منتج ليلي

- ماسك الوجه Glycolic Peel للاسف ما اخذت الحجم الكبير نفس اللي يمه، يستخدم مرتين بالاسبوع ، يعطي نضارة للبشرة بشكل ملحوظ

- ماسك الوجه Instant Detox Mask  تكلمت عنه من قبل، يستخدم مرتين اسبوعياً وهو عبارة عن ماسك تنظيف للوجه بالطين الوردي

- غسول الوجه Instant Foaming Cleanser  ، منعش هالغسول وايد


طبعا لازم اذكر ماسك Nuxe  الجميل


تكلمت عنه وعن كذا ماسك للوجه في هالتدوينة:

سبا منزلي : ماسكات الوجه الجاهزة | HOME SPA: READY-MADE FACIAL MASKS



مفضلاتي من المنتجات الجمالية:

بالنسبة للمنتجات الجمالية ، ما بحط اي نوع فاونديشن لان احس يختلف من بشرة للثانية مو كل شي يناسب الجميع

فقررت اتكلم فقط عن المنتجات اللي احسها بتمشي مع الكل

منها شادوهات انستازيا

باليت Modern Renaissance  و Master Palette by Mario


الوان هالباليتين يكملون بعض ! والشادوز لونهم جداً قوي واتوقع الاغلب شاف ريفوز عليهم

يستاهلون الصدارة بالنسبة لي ! وايد حبيتهم والفرشاة اللي معاهم جداً عملية


ثاني شي من منتجات الجمال ، من شركة NYX




ببتدي بشي ما اشوف وايد يتكلمون عنه ، باليت الحواجب !!

جداً عملي وجداً جمييل !!! وطبيعي وايد حبيته طبعا خذت لي علبه ثانية لان العلبه الاولى انتحرت!

الشي الجميل الشمع اللي مع الشادو، لما احب اقدر اخليه كريمي ولما ابي اخفف استخدم نفس الدرجتين الموجودين

ثاني شغله الغلوس المات.. انه استخدم وايد (وايد وايد!) غلوسات مات من شركات ثانية

لكن لما شريت من NYX ماتوقعت يكونون بهالجودة! (الالوان ذوق بالاخير)

اغلب الغلوسات المات تجفف او اول ما تحطيها تحسين انها وايد رطبه تنتظرين ان تنشف

لكن ملمس ونوع هالغلوس وايد مضبوط ! ومريح ويتم مده ! ومايجفف شفايفي (ايضاً الجفاف له علاقه بالترطيب، لكن في قلوسات تحسين شفايفك تجف حتى لو رطبتيها)


لو احصل درجات ثانية ما بتردد اشتري منها مرة ثانية



أخر شغلة هي Water Primer من Smash Box


اغلب الوقت استخدمه لتثبيت المكياج ، وصج يثبت بالنسبة لي!  يخلي المكياج يصمد مدة اكثر

وايضا ممكن استخدامه لتهيئة البشرة

استخدمت كذا مثبت على الرغم من المدح لكن ما كان يناسبني .. ولكن هاذي يستاهل كل كلمة مدح انقالت فيه !



وخلصنا مفضلات عام 2016 !

اتمنى لكم عام جديدا وسعيد جميعاً ♥


With Love, 

Mai 

أجندتي ومشترياتي لسنة 2017 من Erin Condren

الجمعة، 9 ديسمبر 2016

السلام عليكم ورحمة الله وبركاته 




تاريخ 28 من نوفمبر وصلت اجندتي لسنة 2017 !

يوم سعيد بالنسبة لي لما اشوف بوكس Erin Condren المميز ،




مثل ما قلت من قبل ، كل سنة اطلب من عندهم اجندتي / بلانر  للسنة القادمة، وايد حابه كل تفاصيلها ، الوانها والكلام الايجابي الموجود خلال الصفحات، تعطي طاقة حلوة وتحمس الشخص ان يخطط فيها،

ترى يوجد مجتمع بحد ذاته للتخطيط في هالبلانر هاذي وغيرها ! انصدمت بكمية الناس اللي تحب تخطط فيها ..

كل وحدة تشارك طريقة تنظيم يومها، وقتها ، اعمالها المنزلية ، شغلها الخاص، مواعيدهم وحياتهم مع اطفالهم بطريقة جداً ملهمة  في اليوتيوب والانستقرام ، يوثقون فيها  تفاصيل حياتهم الصغيرة الجميلة .. وكل اللحظات الممتعة..


هاذي ثالث اجندة لي  من عندهم وهالسنة اخترتها تكون بلون Rose Gold  وايد حابه هاللون هالسنة وصايره اشتريه بكثره ، 

نبدأ ال Unboxing معاكم وشنو الاشياء الثانية اللي طلبتها ..




كل سنة يوصلني البوكس بلون مختلف ، وهالسنة اللون الوردي الجميل ، حابه تفاصيل هالبراند يعني لما احد يشوف البوكس يعرف من وين بدون لا يفتحه ، طبعا لازم فيه اثار الرحلة وال Shipping ..


وطريقة Erin Condren  تعطيج شعور ان فيه هدية لك ! حتى لما توصل الفاتورة واول ما يوصلج ايميل لطلبك يكتبون:


 " A gift for you! " 

ولما تفتحين البوكس بتحصلين ورق الهدايا وعليه ستيكر جميل مكتوب Enjoy




وهاذي كل الاغراض اللي طلبتها منهم هالسنة:




 اول شي اخذت باند للبلانر لان عندي فقط واحد وضاع ! وانا احيانا احط اوراق ثانية وكانت الباند تحفظها لي ، 

 ثاني شي من زمان ابي اطلبته ، توجد بلانر عندهم صغيرة اسمها  Wellness Journal هاذي بلانر صحية! يعني فيها تقدرين تتابعين اكلج ، تمارينج ، اهدافج الصحية ، وزنج وقياساتج ! 

حلوة لشنطة الجيم بحيث اقدر اعرف شنو كانت تماريني هالاسبوع، وانا من الاشخاص اللي اشيل اوزان فأحتاج اعرف اي نوع عضلات مرنت وكم مرة بالاسبوع 

وحلو اتابع قياساتي (خصوصا اذا كانت تمارينج تشيلين اوزان) 

سعرها 6 دولار يعني تقريبا 22 ريال سعودي او 2.2 دينار بحريني .

وهاذي تفاصيلها من الداخل من الموقع:





وقرطاسيتهم كثيرة ومتنوعه وطلبت منهم التالي :




طلبت نوتات لاصقة  Sticky Notes من عندهم حجمهم يناسب تقسيمات البلانر وكثير مفيدين، خصوصا اذا بتخططين شي مو متأكدة منه ، ونوع الورق ممتاز


ايضا  Bookmaker  نوعين .. نوع مغناطيسي والنوع الثاني ممكن تركيبه بسهولة بين الصفحات، 


 من حوالي سنة نزلوا ستيكرات خاصة فيهم ، وما ترددت اطلبهم لان اشكالهم جداً جميلة ومصممة بقياس البلانر ويناسبها، طلبت نوعين والديزاين ممتع ، ونوع ثاني اسمه Designer Dots يستخدم لتنظيم المواعيد والاعمال بالالوان، ويوجد منه عينه في كل بلانر جديده.




  الحين الجزء المفضل عندي ..


 My 2017 Erin Condren Life Planner 






حبيتها جداً .. وهالسنة غيروا كذا شغله فيها .. اولها ال Coils اللي تمسك البلانر صارت اكبر وتقدرين تختارين نوعه ..

طبعا اخترت Rose Gold


ميزة اخرى حق هالبراند ان الكفر ممكن تغيرينه ، وناوية اطلب كفرين زيادة لان عندي كود تخفيض ما استخدمته،


ومن داخل تغيرت ايضاً .. الاجندة بشكل مفصل بعرضها في بوست قريب .. من الداخل ..


كان فيه حافظة تكون مع البلانر، والسنة قاموا بفصلها ، شخصياً عندي اريح لان ماكنت استخدمها كثير، وممكن تركبينها بالاجندة اذا حبيتي ،




الموقع يحتوي على وايد اشياء متنوعه وجميلة ومتجددة ، والاحلى تقريبا اغلب الاغراض تقدرون تكتبون عليها وتختارون الالوان..

الموقع يوجد بهالرابط: 


رابط الموقع والتسجيل


هالسنة تطوروا ان يسوون ملاحف و بيجامات ! ما شاء الله ابداع كل سنة عن الثانية وانصح تجوفونه حتى لو ماكنتم مهتمين بعالم البلانرز والتخطيط

وانتهى البوست ❤

اتمنى لكم قراءة ممتعة ! 


With Love,

Mai 

سبا منزلي : ماسكات الوجه الجاهزة | Home Spa: Ready-Made Facial Masks

السبت، 26 نوفمبر 2016

السلام عليكم ورحمة الله وبركاته


انا من اللي احب يكون بالبيت اشياء تساعدني اسوي لي (سبا منزلي) وقت ما احتاج  ..

واحس بشكل عام ضروروي وجود اغراض تساعدج تسوين شي سريع بالبيت لج في ساعة حصلتيها لنفسج بين اشغالج وايد مهمه ،

حلو ان تقدرين تصنعين لج جو خاص فيج ترتاحين فيه وتخصصين ساعه لنفسج تستحقينها، 

احيانا ماسك للوجه والشعر .. مع فيلم جميل .. ولا احلى ! (طبعا بس انه اشوف الفيلم محد يشوفني لان وقتها انا الفيلم !)

وطبعا احب الماسك يكون عملي وسريع (جاهز) وبدون اي معاناة في ازالته ..




كل الماسكات الموجودة طبعا استخدامها مرتين اسبوعياَ ..

واستخدمها بحسب احتاجي.. يعني تتنوع من بين ماسك ترطيب .. تغذية .. تنظيف  وغيره ..

هاذي مجموعة الماسكات اللي عندي حالياً:



1.  Nuxe White - Brightening Perfecting Mask




هالماسك كنت ماخذه حبه وحده منه من سيفورا وكان مكتوب من ال best selling   فقررت اجربه ، 

مثل ما قلت انه احب الشي السريع ،

 طريقة الماسك يكون قطعه قماشية على شكل قناع وتحطينه مباشره على الوجه، تخلينه 10 دقايق و بعدين مجرد تشيلين الماسك

الزائد الموجود تسوين له مساج .. مثل طريقة وايد ماسكات جاهزة. 

قوامه سيروم يكون ويفضل طبعا تستخدمينه قبل النوم ، 

وايد حبيت ملمس بشرتي بعده وخصوصا ثاني يوم الصبح ..  اعتبره ماسك تغذية ويحسن من مظهر البشرة.. 

ولما بحثت عنه حصلت وايد مدح عليه فقررت اشتري العلبة كاملة .. 

 وصار من المفضلين عندي وشريت منه علبتين بعرض جميل من بوتس (اشتري علبه والثانية مجاناً) ..

العلبة تتكون من 6 حبات .. سعرها حوالي 300 ريال سعودي / 30 دينار بحريني ، سعره مرتفع لما نقارنه بالماسكات الثانية .. 

بالنسبة لي يستاهل رقم 1 لان : استخدامه سهل ، سريع ، نتيجته حلوه وبدون اي تعب في ازالته ! 



2. Oatifix - Lush




طبعا معروفين ماسكات لاش عمرهم قصير (شهر تقريبا من تشترينه وضروري يتم بالثلاجة) وكنت ابي ماسك طبيعي مرطب ومغذي ، بشرتي تنقلب جافه احيانا وطبعا ادور شي جاهز ..

هالماسك ماسك ترطيب.. 

 ريحته شوفان طبعا .. اذا من محبي الشوفان وماعندكم مشكله معاه بتعجبكم الريحه ، انه عندي عاديه ريحته 

خلصته في شهر (استخدمته مرتين اسبوعيا) وطريقته تحطينه على بشره نظيفة وتخلينه 20 دقيقة،

 يفضل ما تعدون هالوقت الماسك بيجف وبيكون صعب ازالته (من تجربتي خليته 40 دقيقة اندمجت في فيلم وعانيت في ازالته!) 

طبعا بما ان فيه شوفان ازالة الماسك بتكون مو وايد سهلة لكن مقبولة بالنسبة لي اذا ما جف وايد، 

، الترطيب وايد حلو بعد ما تشيلين الماسك ، وكأن ماسك طبيعي الترطيب يكون مؤقت، ثاني يوم ما احس فيه، 

لكن يعطيني احساس ان بشرتي متغذية، 

بشتريه مستقبلا مرة اخرى، لكن  ابي اجرب ماسكات ثانية من Lush  لستتي طويله فيها ! 



3. Instant Detox Mask - Caudalie 




خذيت مجموعة من هالبراند، ومنها الماسك والحمدلله خذت الحجم الكبير!

ماسك تنظيف يناسب جميع انواع البشرة ومكتوب ان يساعد على تصغير حجم المسام،

 شخصيا ما اعاني من مشكلة لكن عاجبني انه مصنوع من الطين الوردي ، العنب والقهوة  ( يعني ريحته جداً قريبة لقلبي !)

طريقته ايضاً سهلة، تحطين طبقة خفيفة منه على بشرة نظيفة وتخلينه من 5 - 10 دقايق وتغسلينه، لان ماسك طيني بيجف بشكل سريع 

النتيجة الويه تحسين بأنتعاش ونظافة وطبعا يحتاج ترطيب بعده. 

ممكن استخدمه قبل المكياج اذا كانت مناسبة وعندي وقت كافي، 

بالبحرين ، المنتج ما اشوفه بسيفورا، ولكن اظن في سيفورا افرع الخليج موجود،

 شخصيا شريته من صيدلية في تركيا معروفة وللأسف ما يحضرني اسمها. 



4. ماسكات GlamGlow 




هالبراند بديت اجرب فيها بالعلب الصغيرة .. 


اخذت الماسك الاسود المعروف الطيني الاسود .. وماسك الترطيب.. 

YOUTHMUD Tinglexfoliate Treatment

الماسك الاسود ما ناسب بشترتي وحسسها وشلته على طول.. واظن هو طريقته جذي لكن خفت وما رجعت استخدمه .. 

مع ان شفت ريفو ومدح عليه وناسب وايد بنات .. 

طريقته تحطينه على بشرة نظيفة وتتركينه بالكثير 20 دقيقة .. وتشيلينه بحركات دائرية مثل السكراب وتغسلينه .. 


THIRSTYMUD Hydrating Treatment

ماسك الترطيب (الازرق) عجبني وترطيبه قوي ! 

طريقته تحطين منه طبقة خفيفه وتتركينه تقريبا بعد 20 دقيقة .. 

ممكن تشيلينه وتمسحينه اذا كان استخدامج بالنهار ، وممكن تخلينه وتسوين له مساج اذا كان في الليل وانصح بهالطريقة احسن ! 


وانتهى البوست الثاني الحمد لله،


With Love, 

Mai 



ماهي استعداداتكم للسنة الجديدة ؟ | ? What is your preparation for new year

الاثنين، 21 نوفمبر 2016

السلام عليكم ورحمة الله وبركاته


ما هي استعداداتكم للسنة الجديدة ؟

ليش لازم نستعد اصلا .. 

هل انتوا من الاشخاص اللي تمر كل سنة من حياتها نفس السنة اللي قبلها ؟ 

هل تعرفون شنو حققتوا هالسنة ؟ هل كانت سنة حلوة عليكم وفخورين فيها ؟! 

ماهي احلى اللحظات ، المواقف والامنيات اللي تحققت خلال 2016 ؟؟ 

باقي شهر وعدة ايام على بداية السنة الجديدة ويعتبر وقت كافي تتحقق فيه اهداف وامنيات قريبة ليحين ما تحققت،

وممكن يكون حجر الاساس او بداية حلم كبير .. الخطوة الاولى هي الاهم !

مهما كانت طريقتك لاستقبال السنة اليديدة، او حتى لو كنت من الاشخاص اللي ما يهتمون هالنوع من الامور،

طبيعي عند تغيير شي كبير ، مثل انتهاء عام وبداية عام جديد، الواحد يراجع نفسه شوي ويفكر ويتمنى !

والبعض يستغل فرصة العام اليديد  لبداية جديدة .. منعشه .. صفحة بيضاء خاليه من حياته يقدر يبتدي من جديد!





انا من الاشخاص اللي يحبون التخطيط والتنظيم وتتبع اهدافك والانجازات .. 

في خلال شهر ديسمبر احب اراجع كل الاهداف، الامنيات والانجازات اللي حققتها واللي ما حققتها،

طريقتي الشخصية ان استعين بأجندة لطول السنة.. هي الطريقة التقليدية الممتعة بالنسبة لي،

الاجندة استخدمها بكثرة لذلك افضل اللي فيها تقسيم حتى لليوم ، 

لكن يهمني منها (غير تنظيم يومي، اعمالي، والمواعيد ) ان تساعدني اتابع واحقق اهدافي ، او اضيف حق نفسي شي من العادات الايجابية والتخلص من العادات السلبية ، 

لما اكتب اهدافي، احيانا بعد مرور وقت اكتشف ان الهدف ما ابيه ! ان نيتي من الهدف شي ثاني او بكل بساطة تغيرت مشاعري للهدف والتفت لشيء غير،

واخر السنة اشعر بالانجاز لما اقدر اشوف شنو قدرت احققه وشنو مازال ،


لذلك استعدادي حق السنة الجديدة يكون كالتالي:

نوفمبر:

  •  انه مثل ما قلت احب الكتابة التقليدية، احاول القي نظرة تقريبا كل شهر او شهرين على كل ما كتبت اول السنة، وفي نوفمبر ايضا اشوف وين وصلت ، في وقت احقق الباقي؟ في هدف "عافه الخاطر"
  • اطلب اجندتي الجديدة اون لاين ، دايما اخاف تتاخر في الوصول اذا طلبتها في ديسمبر.. واعتبر البحث عن شكل اجندتي الجديدة متعه شخصية ، والاحق طلبيتي يوم بيوم متعه اخرى ( ملاحق وترصد الاوردرات  اون لاين وين وصلت شي ما انصح فيه للقلوب الضعيفه) 
  • طبعا تبتدي محاولاتي ان اغطي اللي ما سويته ، مثلا اخلص كتاب المفروض اكون مخلصته.. 

ديسمبر:

  •  تقريبا اخر اسبوعين من ديسمبر ابتدي التخطيط للسنة اليديدة، اكتب حتى امنيات واماكن ابي اسافر لها .. الخ (التخطيط في الاجندة يعتبر موضوع من المواضيع المستقبلية ايضا ان شاء الله)
  • ابحث عن مدونات تفيدني ومواضيع واشخاص يلهموني ويحفزوني للسنة الجديدة .. بكل بساطة احب اشوف استعدادات الاخرين يمكن اتعلم شي جديد .. 


Erin Condren Life Planner




اجندتي الشخصية هي من الانسانة الملهمة Erin Condren ..وهاذي ثالث اجندة اطلبها من نفس الموقع ثلاث مرات على التوالي،

 طلبت اول نسخة لي من ثلاث سنوات وحاليا كل سنة اقول بغير واكتشفت ان ما قدر ! بكل بساطة هي تاركة مجال انك تصمم كل شي تبيه باجنده فيها طابع إلهامي كبير وطاقة ايجابية جميلة جدا.. في الصورة نسختي 2016 و 2015 ، وتوجد نسخة تكون اكثر من سنة ، لكني افضل افصل كل سنة.

واذا انتوا من مدمنين القرطاسية نفسي Erin Condren  عندها مجموعه جميلة جدا وبعضها ايضا تقدرون تختارون او تكتبون اسمكم عليها.

رابط الموقع والتسجيل



لما توصل اجندتي الجديدة بشرحها بتفاصيلها بأذن الله، بكل ملحقاتها

وانتهى البوست الاول ! ان شاء الله يكون بداية جميلة لبوستات قادمة !




,With Love


  Mai